5 مراحل نفسية تمرى بها قبل بدء بزنس لايق عليكى

 فيه 5 مراحل نفسية بنمر بيها قبل بدء اى بزنس لايق علينا ، الخمس مراحل هم :

  1. عدم معرفة : بتكونى موظفة ومخنوقة من الوظيفة وفاكرة ان السبب هو  شركة سيئة او مدير معاملته سيئة ومرتبات ضعيفة ، مش عارفه ان السبب الرئيسى والحقيقى هو انك طموحة ومش عارفه توظفى نقاط قوتك صح  ومش مدركة انك تقدرى تعملى ده فى بزنس لايق عليكى من الاول ؛ لانك مش عارفه ازاى وتبدئى منين

 

  1. اعتقاد بالمعرفة : تبدئى تدركى ان اى وظيفة تروحيها - حتى لو شركة عالمية ومرتباتها عالية -  مش لايقة عليكى  ، وتبدئى تدورى على حل حقيقى عشان تعملى بزنس لايق عليكى ، الحل ده على شكل معلومات ؛ يعنى مثلا تقرئى كتب او مقالات وفيديوهات على الانترنت او تاخدى كورسات ...الخ

ودى اخطر مرحلة بتمرى بيها ؛ لانك ممكن تكتفى بالكورسات وتكونى فاكرة ان كده كفاية     وتروحى تعملى بزنس لايق عليكى وطبعا فى الاخر هيقع ومش هتكمليه 

 

  1. يقين بعدم المعرفة : تستوعبى وتدركى ان المعلومات والكورسات وحدها لا تكفى وانك محتاجة تدريب وممارسة للبزنس اللى لايق عليكى كثير جدا لحد ما تتقنى شغلك ده وتاخدى فيه خبرة عملية

 

  1. كفاءة : تحسى انك كفء وتقدرى تبدئى بزنس لايق عليكى بالفعل ، ودى اخطر مرحلة تانية من المراحل الخمس ؛ لانك برضه بتكتفى بكده ومع الوقت تكتشفى ان ده مش كفاية عشان تطورى بزنس لايق عليكى  ؛ يعنى ممكن المرحلة دى تحققى منها دخل مثلا 50000 جنيه فى السنة فقط ، وده طبعا مش كفاية لتطوير شغلك

 

 

  1. براعة واتقان : ودى اخر مرحلة بعد ما تطورى من البزنس اللى لايق عليكى وتحطى فيه بصمتك  المميزة اللى مش شبه حد ، فتبعدى عن الزحمة وتكونى مبدعة  ومتفردة فى شغلك

 

يا ترى عدت عليكى المراحل دى ولا لا؟ ..انتى فى اى مرحلة دلوقتى؟

 

 شاركينى باجابتك هنا فى التعليقات او على الفيس بوك  J

 

#اعملى_بزنس_لايق_عليكى

#رفيف_قناوى

 


التصنيفات


التعليقات

Comment سجل دخولك للتعليق

8-12-2017 - 9:57 AM

Benteleslam40

انا في مرحلة يقين بعدم المعرفه

11-11-2017 - 10:20 PM

Mahaamr0706

انا في مرحلة اليقين بعدم المعرفة

31-10-2017 - 10:24 PM

rand

انا المرحلة اللي بمر بيها للاسف هي عدم ثقتي في نفسي اني ممكن اعمل حاجة او ممكن انجح في الحاجة اللي بحبها او البيزنس اللي نفسي فيه

1-11-2017 - 12:42 PM

rafifkenawi

انتى كده فى المرحلة الاولى وهى عدم معرفة بقدراتك...ان شاء الله فى كورس بزنس لايق عليكى اللى اشتركتى فيه تطبقى الخطوات لحد ما توصلى...وانا معاكى فى الاستشارة والمتابعة :)