الخطوة الثانية خطوة اساسية لو تجاهلتها ...مفيش بزنس لايق عليك!

تعرفوا ان واحدة صاحبتى عرفت موهبتها ومشيت وراها وبدأت تطبقها كمان؟

موهبتها هى التأليف ، تأليف قصص وروايات ، انا طبعا مكدبتش خبر ، اتبسطت جدا وقلتلها : مبروووك هتعملى بزنس لايق عليكى قريب وترتاحى نفسيا وتكسبى ماديا كمان !

قلتلها على الخطوات : هتعمل ايه وهتمشى ازاى واحدة واحدة لحد ما تبدا البزنس اللى لايق عليها وعلى موهبتها فى التاليف

وفعلا هى كانت متحمسة جدا للموضوع وقالتلى هطبق الخطوات

وبعد فترة كنت عايزة اطمن عليها عملت ايه ، عارفين هى عملت ايه؟

!!هى طبعا ...فضلت محلك سر ومطبقتش ولا حتى نص خطوة !!!

وقتها انا استغربتها جدا ، وقلت ازاى يعنى جالك فرصة من عند ربنا كده انك تعرفى الطريق بدرى بدرى وماتفضليش تخبطى 10 سنين زى وزى ناس غيرى كتير لحد ما قدروا يعملوا حاجه بتاعتهم يكونوا مبسوطين فيها وكمان مرتاحين ماديا!!!

قالتلى :"انا مش حابه اعملها بزنس دلوقتى...انا بس حاسة انى عايزة استمتع بيها واجربها "

!!!:)

اجمدت فى مكانى وفضلت متنحة وقت طويل اوى ، الكلمة دى رنت فى دماغى جدا 

!!ساعتها بس عرفت ليه انا كنت بخبط فى الاول ووصلت متاخر للبزنس اللى لايق عليا

وفورا اضفت الخطوة دى من خطوات المرحلة الاولى فى نموذج بزنس لايق عليك اللى اسمها (عيشها باستمتاع) !!

ده كان سبب من الاسباب اللى خلتنى اتاخر...

انى مكنتش بدى فرصة لنفسى  اعيش موهبتى الاول قبل ما ابدا افكر ازاى اقلبها بزنس

الصح انك لما تعرف موهبتك ونقاط قوتك ، انك تعيش الموهبة دى وتستمتع بيها وتجربها ، لانك هتستمتع بيها فلما تلاقى عقبات بعدين فى طريق البزنس تقدر تتخطاها بسرعة وتتحملها ، لانك قضيت وقت جميل معاها وده محفور فى ذهنك

اما اذا عرفتها وقلبتها بزنس خبط لزق كده فانت لا فرحت بيها ولا حتى اخدت فيها خبرة ، فبالتالى اى عقبات هتوجهك بعدين فى البزنس هتنزعج منها جدا وهتضايق وغالبا هتتعقد من !!موهبتك وهتكرهها ومش هتكمل ، فلا حصلت تعيشها ولا حصلت تعمل منها بزنس

استمتع بيها الاول وعيشها ، عيشها بحب واستمتاع

صدقنى هتتمسك بيها اكتر وهتاخد فيها خبرة كمان تساعدك بعدين فى البزنس اللى لايق عليك

#عيش_موهبتك_الاول

#اعمل_بزنس_لايق_عليك


التصنيفات


التعليقات

Comment سجل دخولك للتعليق

لا توجد تعليقات